Demokrati og medverknad i skulen

Ein av oppgåvene til skulen er å lære elevane kva demokrati betyr i praksis. Barn har også ein sjølvstendig rett til å bli høyrd, og få seie si meining. Skulen skal derfor gi elevane informasjon på ein slik måte at elevane kan danne seg ei meining. Gjennom samtalar skal skulen sørgje for at elevane får sagt si meining. Sjølv om alle elevar har rett til å uttale seg fritt, har dei inga plikt til å seie noko viss dei ikkje vil.

 

Skulen treng ikkje samtykkje frå foreldra for å snakke med elevane.

 

For at elevane skal få reell medverknad, vil skulen sørgje for at informasjonen frå skulen til elevane vil vere tilpassa alderen på elevane, modnadsnivå, språk og kulturelle bakgrunn.

 

Elevråd

I tillegg til å få ytre seg individuelt, vil det vere mogleg å delta i organiserte former for medverknad, som elevråd. Gjennom elevrådet kan ein få vere med på å bestemme saker som har med skulemiljøet å gjere, kvalitetsutvikling av opplæringa og saker om skulereglar. Elevrådet skal fremje interessene til alle elevane.

 

Foreldresamarbeid

Foreldrene på ein grunnskule kan delta i foreldreråd (FAU), skulemiljøutval og samarbeidsutval. Foreldrerådet blir valt av foreldra.

 

Både elevar og foreldre skal få vere med på å planleggje, gjennomføre og vurdere skuleverksemda, mellom anna arbeidet med skulemiljøet, kvaliteten i opplæringa og skulereglar.